13/11/2014 09:31:35

De Biazi: në këto miqësore do të tentojmë fitoren

Shqipëria do të luajë më 14 nëntor ndaj Francës, një ndeshje që zhvillohet një muaj pas ngjarjeve të shëmtuara të Beogradit ku ekipi ynë ra preh e dhunës së tifozëve dhe policisë vendase

HermesNews - Shqipëria do të luajë më 14 nëntor ndaj Francës, një ndeshje që zhvillohet një muaj pas ngjarjeve të shëmtuara të Beogradit ku ekipi ynë ra preh e dhunës së tifozëve dhe policisë vendase, me shpresën se do të bëjë një tjetër paraqitje dinjitoze dhe do të bindë edhe median ndërkombëtare se ka arritur shumë në planin taktik e sportiv në përgjithësi, për të qenë e barabartë edhe ndaj kundërshtarëve shumë të fortë dhe organizatorëve të Europianit të ardhshëm.

Trajneri i Kombëtares Xhani de Biazi doli dje para gazetarëve për të dhënë përshtypjet e tij nga përgatitja e ekipit dhe objektivave që ka skuadra pr këto dy miqësore të rëndësishme me dy prej emrave më të rëndësishëm të futbollit botëror. Natyrisht që janë miqësore luksi dhe Shqipëria ndihet e vlerësuar dhe e përkushtuar, por për marrjen e një rezultati favorizues është herët për të thënë, pasi kemi përballë ekipe që luajnë në nivel shumë të lartë. Gjithsesi, De Biazi u tregua dje entuziast, duke dhënë garanci se ekipi do të vijojë të luajë në mënyrë të qëndrueshme edhe në vazhdimësi. Kështu, dy miqësoret e radhës kundër Francës dhe Italisë do t’i shërbejnë kombëtares kuqezi për të fituar sa më shumë eksperiencë. Grupi i miksuar mes të rinjve dhe veteranëve kërkon konfirmim edhe në nivele të tilla, prandaj trajneri de Biazi kërkon që skuadra të luajë e bashkuar për të fituar në këto dy sfida. “Duhet të fitojmë sa më shumë eksperiencë pasi luajmë ndaj dy skuadrave të forta.

Kur luan ndaj ekipeve të këtij niveli ka shumë rëndësi paraqitja. Do të kërkojmë të mos pësojmë gola dhe të shfaqemi në fushë siç kemi bërë ndeshjet e fundit. Kam disa mungesa të rëndësishme si Xhaka e Kaçe prandaj nuk kam marrë një vendim për formacionin”, tha që në fillim De Biazi. Çështja Meha nuk krijon aspak konfuzion në radhët e kombëtares sepse De Biazi e ka të qartë situatën e mesfushorit të Paderbornit, i cili nuk është grumbulluar për këto dy përballje. “Kur kanë kaluar 11 ndeshje nga kampionati Gjerman, Meha nuk ka luajtur në 5 të parat, ndërsa në të gjashtën u aktivizua vetëm 12 minuta. Kur e grumbullova për Danimarkën dhe Serbinë e kuptova që nuk ishte në kondicionin e duhur fizik. Tani po luan por nuk besoj se është në gjendje të mirë me vetëm 150 minuta aktivizim. Meqë këto janë dy miqësore mendova për të mirën e klubit, lojtarit dhe kombëtares”, shtoi de Biazi. Tekniku e pranon se dy miqësoret e radhës duhet të ndihmojnë grupin të jetë më i konsoliduar, por në asnjë mënyrë nuk duhet t’i konsiderojnë si sfida të parëndësishme. “Në këto dy sfida nuk do të shkojmë për shëtitje. Ne do të kërkojmë të mos humbasim, madje po të na jepet mundësia do të kërkojmë edhe fitore”, tha De Biazi, me shpresën se dy miqësoret e radhës ndaj dy prej kundërshtarëve më të fortë në Europë do ta rrisin edhe më shumë ekipin tonë kuqezi.

Arbër Meçenovi

Dërgo me email | Stampo artikullin